TuuT jaane ka bhi imkan tha tum jante the
dil men sab kanch ka saman tha tum jante the
rahat-e-qurb-e-rifaqat ke sabab zinda hain
varna jiina kahan asan tha tum jante the
lazzat-e-dard se sairab mujhe is ne kiya
mujh pe ik shaḳhs ka ehsan tha tum jante the
koi avaz bhi patthar nahin karti thi mujhe
apne jangal ka main sultan tha tum jante the
kitna mushkil tha kisi but ki parastish karna
main to kafir bhi musalman tha tum jante the
zindagi mere tasarruf men thi vo kya karta
meri buniyad men tufan tha tum jante the
apne hathon se likhun aur tumhen roz paḌhun
dil men bas ek hi arman tha tum jante the
ham-safar us ke the aur raḳht-e-safar bhi us ka
main to bas be-sar-o-saman tha tum jante the
ab use dard ki dahliz pe chhoḌ aa.e ho
vo to haara hua insan tha tum jante the
jis ki ḳhushbu se mo.attar mere ash.ar the ‘qais’
ek hi phuul miri jaan tha tum jante the
Leave a Reply