Kuchh Yaqin Sa Guman Sa Kuchh Hai

Shahid Kamal

kuchh yaqin sa guman sa kuchh hai

jo bhi hai meri jaan sa kuchh hai

fasle ḳhatm ho ga.e lekin

phir bhi ik darmiyan sa kuchh hai

ham yahin par qayam karte hain

is khanDar men makan sa kuchh hai

haath men hai mahar-e-naqa-e-ḳhak

sar pe ik sa.eban sa kuchh hai

dasht jaan men vo ḳhaak uḌata hua

ab bhi ik karvan sa kuchh hai

khul ga.e us ki nusraton ke alam

vo hava men nishan sa kuchh hai

dekh neze ki is bulandi par

ye koi asman sa kuchh hai

ret par vo paḌi hai mushk koi

tiir bhi aur kaman sa kuchh hai

dekh andaz-e-be-zabani-e-gul

apna tarz-e-bayan sa kuchh hai

chal ke us ki gali men dekhte hain

shor ashuftagan sa kuchh hai