Saghar Mehdi
kuchh to vafa ka rang ho dast-e-jafa ke saath
surḳhi mire lahu ki mila lo hina ke saath
ham vahshiyon se hosh ki baten fuzul hain
paivand kya laga.en darida-qaba ke saath
sadiyon se phir raha huun sukun ki talash men
sadiyon ki bazgasht hai apni sada ke saath
parvaz ki umang na kunj-e-qafas ka ranj
fitrat miri badal ga.i ab-o-hava ke saath
kya pattharon ke shahr men dukan-e-shisha-gar
ik sham.a jal rahi hai ghazab ki hava ke saath
Leave a Reply