Fasl-E-Gul Tohmat-E-Junun Lai

fasl-e-gul tohmat-e-junūñ laa.ī

bastī bastī huī hai rusvā.ī

shahr meñ jab se aa gayā huuñ tire

aur bhī baḌh ga.ī hai tanhā.ī

aarzū ek nā-shagufta kalī

jo sar-e-shāḳh-sār murjhā.ī

āshiqī ik dabī huī sī choT

bhīge mausam meñ jo ubhar aa.ī

zindagī shām-e-ġham kī bāñhoñ meñ

ik sulagtī huī sī tanhā.ī

log kahte haiñ ahl-e-dil ko kabhī

zindagī raas hī nahīñ aa.ī

hausla ho to ai ġham-e-jānāñ

kaun terā nahīñ tamannā.ī

Leave a Comment