Prem Warbartani
dekho ki dil-jalon ki kya ḳhuub zindagi hai
parvane jal chuke hain aur sham.a jal rahi hai
kahne ko muḳhtasar sa ik lafz hai mohabbat
lekin usi men saari duniya chhipi hui hai
ḳhvab-e-hasin se mujh ko chaunka diya hai kis ne
kis ne chaman men aa kar avaz mujh ko di hai
dekho zara farogh-e-husn-e-bahar dekho
ik ik kali chaman ki dulhan bani hui hai
laa.e bashar kahan se us husn ki misalen
qudrat jise bana kar hairat men kho ga.i hai
bujhti nahin hai saare aalam ke ansuon se
ye kaisi aag mere dil men bhaḌak rahi hai
ai ‘prem’ zarb-e-sar se zindan ko toḌ Daalo
pabandiyon ka jiina bhi koi zindagi hai
Leave a Reply