kuchh to mohabbaton ki vafa.en nibha.un main
shadab barishon ki hava.en nibha.un main
itne qarib aao badan bhi suna.i de
guzre dinon ki narm sada.en nibha.un main
dil bhi to chahta hai ki sabza kahin khile
banjar zamin pe kaali ghaTa.en nibha.un main
dariya ki lahr pyase kinaron ko saunp duun
ma.asum aarzu ki ḳhata.en nibha.un main
shadab ho bhi sakte hain chehre nasib ke
phaila.un haath aur dua.en nibha.un main
rah jaa.e kuchh to jalte badan par use rakhun
har lamha ḳhushbuon ki qaba.en nibha.un main
manzur ho tumhen to mohabbat ke naam par
ma.asum ḳhvahishon ki saza.en nibha.un main
ta-umr zindagi ko nibhana muhal hai
kuchh roz sadgi ki ada.en nibha.un main
kholun na raushni ke dariche nigah men
‘usha’ dilon ki tiira faza.en nibha.un main
Leave a Reply