Syed Amin Ashraf
ranj-e-duniya ho ki ranj-e-ashiqi kya dekhna
saari ḳhushiyan hairaten sab ek si kya dekhna
baagh bazar-e-tamasha aankh juya-e-bahar
chashm-e-nargis ya tan-e-sarv-e-sahi kya dekhna
dekhna kya ek hi shai su-e-batin dekhiye
be-hisi be-chehragi be-manzari kya dekhna
saaz men bala-e-naghma aur avazen bhi hain
ik sharar-e-naghmagi avaz ki kya dekhna
rah-e-sahra hai na aati hai kahin fasl-e-bahar
ishq men divangi jama-dari kya dekhna
mushkilon men kaam aa jaati hai ashufta-sari
ai junun-saman-e-kar-e-agahi kya dekhna
jab use dekha to ji chaha ki dekha hi karun
sochta ye tha ki naz-e-dilbari kya dekhna
Leave a Reply