kuchh log to itni bhi muravvat nahin karte
milne ki kabhi ḳhud se bhi zahmat nahin karte
is baar to raste bhi mujhe rok rahe hain
divar-o-dar-o-bam hi ulfat nahin karte
bazar men ab kaun ḳharidar hai apna
itni bhi ziyada abhi qimat nahin karte
kya hoga sar-e-sham jo ham honge na ghar men
ye soch ke ham shahr se hijrat nahin karte
kahte hain faqiron ki fazilat pe qasa.ed
ham aaj bhi hukkam ki bai.at nahin karte
sajdon ke evaz ḳhuld-e-barin mangne vaalo
kyuun apne makanon ko hi jannat nahin karte
chhup jaate hain aghosh men suraj ki hamesha
ye chand-sitare kabhi rehlat nahin karte
sukhe hue peḌon pe koi phuul nahin hai
kyuun in se parinde bhi mohabbat nahin karte
divar to uThti hui dekhenge gharon men
vo log jo bachchon ko nasihat nahin karte
Leave a Reply