kuchh log jo hasil hon ganva.e nahin jaate
is tarah ḳhazane to luTa.e nahin jaate
amrit tiri baton ka hi kaafi hai ajal ko
yuun zahr pyale to pila.e nahin jaate
kyon ham se hue jaate ho anjan achanak
is tarah to paiman bhula.e nahin jaate
jaise tiri yadon ko sajaya hai qafas men
aise to shabistan bhi saja.e nahin jaate
rahte hain kasak ban ke tiri yaad ke jugnu
is dil se tiri yaad ke saa.e nahin jaate
koi use batla.e ki aa jaa.e vagarna
ab ham se diye aur jala.e nahin jaate
jis tarah dil-soḳhta ko main ne sulaya
us tarah to bachche bhi sula.e nahin jaate
‘shakir’ main vo andaz-e-jafa bhuul to ja.un
jo naqsh hain dil par vo miTa.e nahin jaate
Leave a Reply