sunoge tum bhi miri dastan kabhi na kabhi
asar dikha.ega dard-e-nihan kabhi na kabhi
kabhi to atish-e-namrud sard bhi hogi
qarar pa.ega qalb-e-tapan kabhi na kabhi
ye aaj gardish-e-sham-o-sahar batati hai
nazar bacha.ega ḳhud asman kabhi na kabhi
kabhi to gauhar-e-nayab haath aa.ega
milega ruh-e-ḳhudi ka nishan kabhi na kabhi
jamud-e-sehr-e-tamanna men rah nahin sakta
farogh pa.ega azm-e-javan kabhi na kabhi
azaan bilal ki gunji hai regzaron men
sunega dil ki sada ye jahan kabhi na kabhi
‘aziz’ teri mohabbat bhi rang la.egi
tamam hoga gham-e-bekaran kabhi na kabhi
Leave a Reply