Asad Badayuni
kuchh log ji rahe hain ḳhuda ke baghair bhi
sannaTe gunjte hain sada ke baghair bhi
miTTi ki mumlikat men numu ki zakat par
zinda hain peḌ ab-o-hava ke baghair bhi
ye nafraton ke zard alaav na honge sard
phailegi aag tez hava ke baghair bhi
rabt-o-ta.alluqat ka mausam nahin koi
barish hui hai kaali ghaTa ke baghair bhi
duniya ke kar-zar men bachchon ko maaon ne
ruḳhsat kiya hai harf-e-dua ke baghair bhi
ḳhauf-e-ḳhuda men umr guzari to kya mila
kuchh din jiyenge ḳhauf-e-ḳhuda ke baghair bhi
Leave a Reply