Pinhaan
kuchh bhi to yahan hasb-e-maratib nahin lagta
aur shikva-e-halat munasib nahin lagta
kyon us se kahen kuchh ki jo sun ke bhi rahe chup
aisa to muḳhatib bhi muḳhatib nahin lagta
aata bhi nahin samne karta bhi nahin baat
mahbub kahan vo to musahib nahin lagta
iblis chura laaya hai kya lauh-o-qalam bhi
vo malik-e-taqdir ye katib nahin lagta
insan se insan ka ta.aruf bhi nahin hai
surat se koi sadiq-o-kazib nahin lagta
shar jiit gaya haar gaya ḳhair yahan bhi
dil ab to mohabbat ka bhi talib nahin lagta
jis dard ki duniya men dava.en nahin miltin
us dard ka iz.har munasib nahin lagta
Leave a Reply