Kashif Rafiq
kuchh bhi kar lijiye vo vaz.a badalne ke nahin
ya.ani ham karb-o-aziyyat se nikalne ke nahin
ham bhale kucha-e-viran men akele bhaTken
is zamane ki ravish par kabhi chalne ke nahin
aa.ina hai hamen jab tak tiri ḳhandan surat
ham kisi ranj ki tasvir men Dhalne ke nahin
haan kabhi soz-e-darun un ko ghula de shayad
varna nalon se hamare vo pighalne ke nahin
ho chuke ḳhaak jo jal kar vo patange ai sham.a
dusri baar tire sho.ale se jalne ke nahin
sehn-e-dil men jo laga.e the tamanna ke shajar
aisa lagta hai vo imsal bhi phalne ke nahin
jab talak manzil-e-ulfat pe nazar hai ‘kashif’
paanv apne kisi Tiile se phisalne ke nahin
Leave a Reply