Rashid Shahjahanpuri
kuchh aisa be-sar-o-pa ziist ka nizam raha
ki jo usuul banaya vo na-tamam raha
harim-e-naz men kuchh aisa ehtimam raha
uThe hijab magar shauq tishna-kam raha
vo kam-nasib sikandar huun main ḳhuda ki panah
pahunch ke chashma-e-haivan pe tishna-kam raha
chhupa.e arzu-e-dil gaya tire dar tak
tavaf-e-ka.aba-e-maqsud be-maram raha
agar ho izn-e-taghaful to aap ghaur karen
na jaane kyon mujhe aaj intizar-e-sham raha
huzur-e-ishq saza-var-e-sad-malamat hai
vo na-murad jo ulfat men shad-kam raha
miri sarisht hi kuchh ḳhugar-e-asiri thi
mili qafas se riha.i asir-e-dam raha
‘rashid’ ghairat-e-rindi hai mana-e-tauba
tamam umr to jam-o-subu se kaam raha
Leave a Reply