Koi Yaad Hi Rakht-E-Safar Thahre Koi Rahguzar Anjaani Ho

koi yaad hi rakht-e-safar thahre koi rahguzar anjani ho

jab tak miri umr javan rahe aur ye tasvir purani ho

koi naav kahin manjdhar men Duube chand se uljhe aur udhar

maujon ki vahi halqa-bandi dariya ki vahi tughyani ho

isi raat aur din ke mele men tira haath chhute mire hathon se

tire saath tiri tanhai ho mire saath miri virani ho

yuun khana-e-dil men ik khushbu abad hai aur lau deti hai

jo bad-e-shimal ke pahre men koi tanha raat ki raani ho

kya DhunDte hain kya kho baithe kis ujlat men hain log yahan

sar-e-rah kuchh aise milte hain jaise koi rasm nibhani ho

ham kab tak apne hathon se khud apne liye divar chunen

kabhi tujh se hukm-uduli ho kabhi mujh se na-farmani ho

kuchh yaden aur kitaben hon mira ishq ho aur yarane hon

isi ab-o-hava men rahna ho aur saari umr bitani ho

Leave a Comment