koi vazifa mujhe bhi bata mire darvesh
tujhe hui hai faqiri ata mire darvesh
miri ḳhata to bas itni hai is ta.alluq men
yahi ki honi ko hone diya mire darvesh
ise main pyaar mohabbat ka naam kaise duun
ye aur tarah ka hai tajraba mire darvesh
ki jis ne bandh diya teri zaat se mujh ko
ye ruuh ka hai koi silsila mire darvesh
har ek saans juḌi hai tiri raza ke saath
to kya yahi hai mukammal vafa mire darvesh
tu zindagi ka sitara bhi isti.ara bhi
mire liye tu hai suraj-numa mere darvesh
ye tera ishq mahakta hai raat din mujh men
ki aur kuchh nahin mujh men naya mire darvesh
ki ab vajud se maujud se nahin hai gharaz
hai la-vajud ki mujh men sada mire darvesh
Leave a Reply