duniya bhi ajab qafila-e-tishna-laban hai
har shaḳhs sarabon ke ta.aqub men ravan hai
tanha tiri mahfil men nahin huun ki mire saath
ik lazzat-e-pabandi-e-iz.har-o-bayan hai
haq baat pe hai zahar bhare jaam ki ta.azir
ai ghairat-e-iman lab-e-suqrat kahan hai
kheton men samati nahin phuli hui sarson
baghon men abhi tak vahi hangam-e-ḳhizan hai
ehsas mira hijr-gazida hai azal se
kya mujh ko agar koi qarib-e-rag-e-jan hai
jo dal ke samundar se ubharta hai yaqin hai
jo zehan ke sahil se guzarta hai guman hai
phulon pe ghaTaon ke to saa.e nahin ‘anvar’
avara-e-gulzar nasheman ka dhuan hai
Leave a Reply