Swapnil Tiwari
us ke honTon par sur mahka karte hain
ham ab ḳhushbu se tar soya karte hain
raushan rahte hain gham sat.h pe ashkon ki
ye patthar paani par taira karte hain
din bhar main in ki nigarani karta huun
shab bhar mere sapne jaaga karte hain
ankhen dhote hain sone ke paani se
jagte hi jo tum ko dekha karte hain
vo jo jhonke jaisa aata jaata hai
ham jo hava ko chhu kar bikhra karte hain
pandrah din ka ho kar marne lagta hai
kyuun ham chand ko paala posa karte hain
ham ko aansu hi milte hain siip men bhi
vo ashkon men moti roya karte hain
bosa lene men kyuun kaT jaate hain honT
ham manjhe danton se kaaTa karte hain
aksar sansen rok ke sunta rahta huun
us ke lams badan par dhaḌka karte hain
niind khule to us ko pahlu men paa.en
ham bhi kaise sapne dekha karte hain
saara ghussa ab bas is kaam aata hai
ham is se cigarette sulgaya karte hain
Leave a Reply