Koi Moajiza Hua Hai Meri Be-Khudi Se Aage

Neena Sahar

koi moajiza hua hai miri be-khudi se aage

tera gham nikal gaya hai miri har khushi se aage

miri pyaas ka tarana yuun samajh na aa sakega

mujhe aaj sun ke dekho miri khamoshi se aage

main huun saans saans tanha main huun zarra zarra ghayal

mujhe paas aa ke dekho miri dilkashi se aage

vahin kal bhi phir milenge jahan aaj mil rahe hain

teri raushni ke pichhe miri tirgi se aage

isi dar se padh na paai main tira payam janan

kahin dil ko chhu na jaae miri bebasi se aage