Koi Din Zabt-E-Ulfat Ka Natija Dekh Lete Hain

Sahir Siyalkoti

koi din zabt-e-ulfat ka natija dekh lete hain

agar chaho to ham ye bhi tamasha dekh lete hain

hamen dariya men qatre ka nazar aana bhi mushkil hai

magar ahl-e-nazar qatre men dariya dekh lete hain

navazish hai ki gahe-gahe aa jaate ho milne ko

koi din zindagi men ham bhi achchha dekh lete hain

kabhi qatre men dariya ko kabhi zarre men sahra ko

ye zalim dekhne vaale bhi kya kya dekh lete hain

pashemani to hoti hai hamen inkar karne se

magar saaqi ka andaz-e-taqaza dekh lete hain

asar dil par nahin hota misal-e-a.ina lekin

hamen jo kuchh dikhata hai zamana dekh lete hain

vaqar-e-zindagi men kuchh izafa ho hi jaata hai

kabhi jab ham tumhara ru-e-zeba dekh lete hain

ḳhalish dil se kabhi zauq-e-junun ki miT nahin sakti

ham ab bhi ghar se uTh kar su-e-sahra dekh lete hain

baḌi raunaq hai ishq-o-husn ki mahfil men ai ‘sahir’

magar ham duur hi rah kar nazara dekh lete hain