Om Prabhakar
kisi zamin se kisi asman se aate hain
ghazal ke sher to donon jahan se aate hain
vo chand lafz dhaḌakte hain jo dilon ki tarah
miri zaban men teri zaban se aate hain
chale jo dar se tire kho ga.iin sabhi samten
bata.en kaise ki ab ham kahan se aate hain
jahan pahunch ke na lauTe kabhi farishte bhi
vo ḳhuld ho ki na ho ham vahan se aate hain
vo ham-safar ki jo rahte hain aḳhiri dam tak
bahut purani kisi dastan se aate hain
Leave a Reply