kisi surat numud-e-soz-e-pinhani nahin jaati
bujha jaata hai dil chehre ki tabani nahin jaati
nahin jaati kahan tak fikr-e-insani nahin jaati
magar apni haqiqat aap pahchani nahin jaati
nigahon ko khizan-na-ashna banna to aa jaae
chaman jab tak chaman hai jalva-samani nahin jaati
pashiman-e-sitam vo dil hi dil men rahte hain lekin
khusha husne ki tarz-e-na-pashimani nahin jaati
mizaj-e-ahl-e-dil be-kaif-o-masti rah nahin sakta
ki jaise nikhat-e-gul se pareshani nahin jaati
sadaqat ho to dil sinon se khinchne lagte hain vaaiz
haqiqat khud ko manva leti hai maani nahin jaati
bulandi chahiye insan ki fitrat men poshida
koi ho bhes lekin shan-e-sultani nahin jaati
gae vo din ki dil sarmaya-dar-e-dard-e-paiham tha
magar ankhon ki ab tak mir-samani nahin jaati
jise raunaq tire qadmon ne de kar chhin li raunaq
vo laakh abad ho us ghar ki virani nahin jaati
vo yuun dil se guzarte hain ki aahat tak nahin hoti
vo yuun avaz dete hain ki pahchani nahin jaati
mujhe to kar diya sairab saaqi ne mire lekin
miri sairabiyon ki tishna-samani nahin jaati
nahin maalum kis aalam men husn-e-yar dekha tha
koi aalam ho lekin dil ki hairani nahin jaati
jale jaate hain badh badh kar mite jaate hain gir gir kar
huzur-e-shama parvanon ki nadani nahin jaati
mohabbat men ik aisa vaqt bhi dil par guzarta hai
ki aansu khushk ho jaate hain tughyani nahin jaati
‘jigar’ vo bhi ze-sar-ta-pa mohabbat hi mohabbat hain
magar un ki mohabbat saaf pahchani nahin jaati
Leave a Reply