Kisi Suragh Se Kamre Mein Nur Utrega

kisī surāġh se kamre meñ nuur utregā

zarūr añdheroñ kā ik din ġhurūr utregā

ḳhafā hai mujh se to us ko ḳhafā hī rahne do

milūñgā us se to ġhussa zarūr utregā

patā chalegā tabhī kyā gañvā diyā tum ne

tumhāre sar se jab us kā fitūr utregā

bas intizār meñ rah jā.egī vo shahzādī

uḌan-khaTolā kahīñ jā ke duur utregā

chamak uThegā ye paanī bhī chāñdnī kī tarah

ye chāñd dariyā meñ jab chūr-chūr utregā

kiye pe apne tū pachhtā.egā ba-har-sūrat

kharā kasauTī pe jab be-qusūr utregā

Leave a Comment