Pawan Kumar
kisi suragh se kamre men nuur utrega
zarur andheron ka ik din ghurur utrega
ḳhafa hai mujh se to us ko ḳhafa hi rahne do
milunga us se to ghussa zarur utrega
pata chalega tabhi kya ganva diya tum ne
tumhare sar se jab us ka fitur utrega
bas intizar men rah ja.egi vo shahzadi
uḌan-khaTola kahin ja ke duur utrega
chamak uThega ye paani bhi chandni ki tarah
ye chand dariya men jab chur-chur utrega
kiye pe apne tu pachhta.ega ba-har-surat
khara kasauTi pe jab be-qusur utrega
Leave a Reply