har ik mahaul se beganagi mahsus hoti hai
kahin apni kahin teri kami mahsus hoti hai
abhi se kyuun juda.i ki aziyyat ka karen shikva
abhi dil men tiri maujudgi mahsus hoti hai
mohabbat ka karishma koi dekhe tere kuche men
khule bandon yahan luT kar ḳhushi mahsus hoti hai
tire irshad-e-be-avaz ko jab dil se sunta huun
ḳhamoshi guftugu karti hui mahsus hoti hai
tasallut hai abhi josh-e-junun par hosh-mandi ka
abhi divangi divangi mahsus hoti hai
unhen pa kar bhi rahta hai tajassus ka vahi aalam
koi shai jis tarah khoi hui mahsus hoti hai
talash apni hai ya un ki kuchh andaza nahin hota
basa-auqat yuun avargi mahsus hoti hai
tiri nazron ka nashtar to ba-ru-e-kar hai lekin
mohabbat ki ḳhalish men kyuun kami mahsus hoti hai
ye maana ajnabiyyat ki faza hai bazm-e-alam men
magar har shakl pahchani hui mahsus hoti hai
kisi ko dekh kar yarab ye ab kya dekhta huun main
nazar anvar men khoi hui mahsus hoti hai
nahin hote to hoti hain ‘rishi’ tarikiyan dil men
vo hote hain to dil men raushni mahsus hoti hai
Leave a Reply