ye kya halat bana rakkhi hai ye asar kaise hain
bahut achchha-bhala chhoda tha ab bimar kaise
vo mujh se puchhne aai hai kuchh likkha nahin mujh par
main us ko kaise samjhaun mire ashar kaise hain
miri sochen hain kaisi kaun in sochon ka markaz hai
jo mere zehn men palte hain vo afkar kaise hain
mire dil ka alavon aaj tak dekha nahin jis ne
vo kya jaane ki shoale surat-e-izhar kaise hain
ye mantiq kaun samjhega ki yakh-kamre ki thandak men
mire alfaz ke malbus shoala-bar kaise hain
zara si ek farmaish bhi puuri kar nahin sakte
mohabbat karne vaale log bhi lachar kaise hain
judai kis tarah bartav ham logon se karti hai
mizajan ham-sukhnavar be-dil-o-be-zar kaise hain
Leave a Reply