abbas-rizvi

Sitare Chahte Hain Mahtab Mangte Hain

sitare chahte hain mahtab mangte hain

mire dariche nai ab-o-tab mangte hain

vo khush-khiram jab is raah se guzarta hai

to sang-o-khisht bhi izn-e-khitab mangte hain

koi hava se ye kah de zara thahar jaae

ki raqs karne ki mohlat hubab mangte hain

ajiib turfa-tamasha hai mere ahd ke log

saval karne se pahle javab mangte hain

talab karen to ye ankhen bhi in ko de duun main

magar ye log in ankhon ke khvab mangte hain

ye ehtisab ajab hai ki mohtasib hi nahin

rikab thamne vaale hisab mangte hain

sutun-o-bam ki divar-o-dar ki shart nahin

bas ek ghar tire khana-kharab mangte hain

More Poems

Leave a Comment