Kisi Ko Chhod deta Hun Kisi Ke Sath Chalta Hun

Ahmad Rizwan

kisi ko chhod deta huun kisi ke saath chalta huun

main chalta huun to phir vabastagi ke saath chalta huun

sitare bantne vaale kisi pal laut aenge

chalo kuchh der yunhi tirgi ke saath chalta huun

mujhe ye kya padi hai kaun mera ham-safar hoga

hava ke saath gaata huun nadi ke saath chalta huun

vo kahte hain zamana tez hai lambi masafat hai

mohabbat ka sitara huun sabhi ke saath chalta huun

badalte mausamon ka khvab huun kitne zamanon se

yahan main karvan-e-zindagi ke saath chalta huun

manazir rok lete hain mire uthte qadam ‘ahmad’

zara sa bhi agar beganagi ke saath chalta huun