Tarikiyon Mein Apni Ziya chhoD Jaunga

Guhar Khairabadi

tarikiyon men apni ziya chhoḌ ja.unga

guzrunga main to naqsh-e-vafa chhoḌ ja.unga

duniya ke log sunte rahenge tamam umr

lafzon men apne dil ki sada chhoḌ ja.unga

apne lahu se phuul khila kar hayat ke

har samt ḳhushbuon ki faza chhoḌ ja.unga

rakhengi yaad husn ki ra.ana.iyan mujhe

vo gulistan men rang naya chhoḌ ja.unga

har ik qadam banegi jo tahzib ki misal

vo zindagi ki tarz-e-ada chhoḌ ja.unga

sinchega phir chaman men use mere ba.ad kaun

jis peḌ ko yahan main hara chhoḌ ja.unga

ye sochta huun jab kabhi hoga mira safar

kya kya main le ke ja.unga kya chhoḌ ja.unga

tarke men kuchh bhi chhoḌun na chhoḌun yahan magar

bachchon ke haq men apni dua chhoḌ ja.unga

pahunchega faiz jis se zamane ko ai ‘guhar’

ilm-o-hunar ki main vo ghaTa chhoḌ ja.unga