Ek Wo Hi shaKHs Mujhko Ab Gawara Bhi Nahin

Atif Khan

ek vo hi shaḳhs mujh ko ab gavara bhi nahin

jabr ye us ke siva apna guzara bhi nahin

shakl-e-hijrat rang la.in aḳhirash sab koshishen

ham agar lauTe nahin us ne pukara bhi nahin

jis pe tum ḳhamosh ho bas ik zara si baat thi

baat bhi aisi ki jis men kuchh ḳhasara bhi nahin

hain ajab dariya men ham jo darmiyan se ḳhushk hai

aur ajab to ye kinare par kinara bhi nahin

fazl ik bas be-hisi aur shaghl ik bas ḳhamushi

ya.ani koi zindagi ka isti.ara bhi nahin

aa ke mere ghar ka ‘atif’ ye tamasha dekhiye

mere dar-divar ko chhat ka sahara bhi nahin

bas bhi kar ‘atif’ ke teri rahbari se ba.az aa.e

ghar-e-shab men sub.h ka koi sitara bhi nahin