kisi ki jubba-sa.i se kabhi ghista nahin patthar
vo chaukhaT mom ki chaukhaT hai ya meri jabin patthar
khula ab rakhte hain pahlu main pinhan naznin patthar
na tha ma.alum hain qalb-e-butan-o-mah-jabin patthar
biThaya ḳhatam-e-izzat pe tere nam-e-nami ne
vagarna hai ye zahir tha haqiqat men nagin patthar
dikha.e phir na kyuun tasir apni jazb-e-ruhani
yaqin ho jaa.e jab hajat-rava hai bil-yaqin patthar
talash-e-yar men kya ḳhaar daman-gir himmat hon
hue nadim mile jab sadd-e-rah ban kar kahin patthar
jo main ai koh-kan duun jan-e-shirin ishq-e-shirin men
to dikhla.e baja.e shiir ju-e-abgin patthar
gira duun faiz-e-e.ajaz-e-nubuvvat se vo momin huun
chhupa.en phir muḳhalif gar myan-e-astin patthar
pas-e-murdan rahe qalb-o-jigar men gar yahi sozish
to lauh-e-sang-e-marmar hogi az ḳhud atishin patthar
ye kahta hai kisi na-mehrban ka mehrban hona
pasijenge tiri garmi se ah-e-atishin patthar
girin har sang-dil par bijliyan aisi havadis ki
ki dete hain gavahi teri ah-e-atishin patthar
‘habib’ aa.e kahan se tazgi naḳhl-e-mazamin men
jahan tak dekhiye hai yak-qalam ye gul-zamin patthar
Leave a Reply