Aslam Noor Aslam
kisi ki duuri ka ehsas kyuun dilati hai
ajab hai chandni mujh ko bahut satati hai
main is ḳhayal se tanha safar pe nikla huun
kabhi to raah bhi ḳhud rasta dikhati hai
kisi ka lahja koi baat chhoTi saada si
kabhi kabhi to bahut dard de ke jaati hai
main tere ḳhvab liye raat bhar Tahalta huun
mujhe bata ki tujhe kaise niind aati hai
tum apne aage kisi aur ko na samjho kuchh
koi kitab ye tahzib kab sikhati hai
ana ki zid pe hue jab kabhi savar ‘aslam’
kisi ki baat kahan kab samajh men aati hai
Leave a Reply