dard ko ham zindagi ka kaif-o-kam kahte rahe
ḳhamushi ke saaz par rudad-e-gham kahte rahe
gosh-bar-avaz puuri bazm men koi na tha
dastan-e-arzu kahne ko ham kahte rahe
intiha-e-yas men chalte rahe be-mudda.a
dekhne vaale hamen sabit-qadam kahte rahe
dil fareb-e-zindagi men be-tarah uljha raha
ishq ko azad patthar ko sanam kahte rahe
kam-savadon ko masiha na-ḳhudaon ko ḳhuda
buud ko nabud hasti ko adam kahte rahe
apne ḳhuun se dastan-e-gham raqam karte rahe
lauh-e-dil ko nok-e-ḳhanjar ko qalam kahte rahe
aarzu ke kitne but-ḳhane the is dil men nihan
‘arsh’ jis dil ko sabhi taq-e-haram kahte rahe
Leave a Reply