Kisi Ka Kaam dil Is Charkh Se Hua Bhi Hai

kisi ka kaam dil is charkh se hua bhi hai

koi zamane men aram se raha bhi hai

kisi men mehr-o-mohabbat kahin vafa bhi hai

koi kisi ka zamane men ashna bhi hai

koi falak ka sitam mujh se bach raha bhi hai

jana nasib koi mujh sa dusra bhi hai

bura na maniyo main puchhta huun ai zalim

ki be-kason ke satae se kuchh bhala bhi hai

jo pukhta-maghz hain ve soz-e-dil nahin kahte

kisi ne shama se jalne men kuchh suna bhi hai

tum is qadar jo nidar ho ke zulm karte ho

butan hamara tumhara koi khuda bhi hai

tu qatilon se lagata hai dil ko kyuun ‘taban’

ki un ke haath se jiita koi bacha bhi hai