Mahrumi

Akhtar Ul Iman

tu bhi taqdir nahin dard bhi painda nahin

tujh se vabasta vo ik ahd vo paiman-e-vafa

raat ke akhiri aansu ki tarah duub gaya

khvab-angez nigahen vo lab-e-dard-fareb

ik fasana hai jo kuchh yaad raha kuchh na raha

mere daman men na kaliyan hain na kante na ghubar

shaam ke saae men vamanda sahar baith gai

karvan laut gaya mil na saki manzil-e-shauq

ek ummid thi so khak-basar baith gai

ek do-rahe pe hairan huun kis samt badhun

apni zanjiron se azad nahin huun shayad

main bhi gardish-e-gah-e-ayyam ka zindani huun

dard hi dard huun fariyad nahin huun shayad

zer-e-mizhgan tapish-e-ah ke pighlae hue

dabdabate hue taron se mujhe kya lena

tere aansu mire daghon ko nahin dho sakte

tere phulon ki baharon se mujhe kya lena

apne anjam ki tashvish ab ainda nahin