Sagheer Malal
kisi insan ko apna nahin rahne dete
shahr aise hain ki tanha nahin rahne dete
da.ere chand hain gardish men azal se jo yahan
koi bhi chiiz hamesha nahin rahne dete
kabhi nakam bhi ho jaate hain vo log ki jo
vapsi ka koi rasta nahin rahne dete
un se bachna ki bichhate hain panahen pahle
phir yahi log kahin ka nahin rahne dete
jis ko ehsas ho aflak ki tanha.i ka
der tak us ko akela nahin rahne dete
vaqa.i nuur liye phirte hain sar pe koi
apne atraf jo saaya nahin rahne dete
zindagi pyari hai logon ko agar itni ‘malal’
kyuun masihaon ko zinda nahin rahne dete
Leave a Reply