kisi bhi taur tabi.at kahan sambhalne ki
tu mil bhi jaa.e to halat nahin badalne ki
ḳhud apni ham-safari se bhi ho ga.e mahrum
ki aarzu thi tujhe saath le ke chalne ki
kisi tarah to mile qahr-e-bekasi se najat
koi to raah ho is karb se nikalne ki
asiir hi rahe ham pichhle ahd-namon ke
hamen ḳhabar hi nahin thi ruten badalne ki
havaon ne hamen jaḌ se ukhaḌ kar phenka
ki aarzu thi hamen phulne ki phalne ki
bana liya hamen apni hi tarah ka tu ne
hamen jo zid thi tiri ḳhvahishon men Dhalne ki
udaas shamon ko kya dekh dekh rote ho
abhi to a.engi raten lahu ugalne ki
ek aise vaqt men jab zindagi bhi maut lage
‘riyaz’ kaun si surat ho dil bahalne ki
Leave a Reply