Arsh Sahbai
kise ḳhabar thi ki zehn-o-dil men ajiib sa intishar hoga
vo vaqt aa.ega be-yaqini ka char-janib ghubar hoga
ye saaf zahir hai zindagi men sukun ki hogi na koi surat
kahin ḳhizan ki ijara-dari kahin fareb-e-bahar hoga
yahan ka aa.iin hi ajab hai ki tarz-e-nau ka ye mai-kada hai
jo bekason ka lahu piyega vo mai-kashon men shumar hoga
na chheḌiye naghma-e-mohabbat ki ye hai daur-e-fareb-kari
dilon ki ḳhush-rang vadiyon men kuduraton ka ghubar hoga
chale to ho ‘arsh’ rah-e-haq par liye hue dil men azm lekin
jahan jahan bhi qadam paḌenge vahin vahin ḳharzar hoga
Leave a Reply