Wahshat Raza Ali Kalkatvi
kis nam-e-mubarak ne maza munh ko diya hai
kyuun lab pe mire zamzama-e-sall-e-ala hai
kis dar ki gada.i miri qismat men hai ya rab
sar par jo mire saya-fagan bal-e-huma hai
siine men mire dagh-e-gham-e-ishq-e-nabi hai
ik gauhar-e-nayab mire haath laga hai
sargarm hai dil shafa-e-mahshar ki talab men
kafir huun agar kuchh bhi gham-e-roz-e-jaza hai
gustaḳh tiri mad.h-sara.i men hai ‘vahshat’
kyunkar na ho tere hi to kuche ka gada hai
Leave a Reply