Kis Jhutpute Ke Rang Ujalon Mein Aa Gae

kis jhutpute ke rang ujalon men aa gae

tukde shafaq ke dhuup se galon men aa gae

afsurdagi ki lai bhi tire qahqahon men thi

patjhad ke sur bahar ke jhalon men aa gae

ud kar kahan kahan se parindon ke qafile

nadida paniyon ke khayalon men aa gae

husn-e-tamam the to koi dekhta na tha

tum dard ban ke dekhne valon men aa gae

kante samajh ke ghaas pe chalta raha huun main

qatre tamam os ke chhalon men aa gae

kuchh rat-jage the jin ki zarurat nahin rahi

kuchh khvab the jo mere khayalon men aa gae

Leave a Comment