Kis Ehtiyat Se Sapne Sajaane paDte Hain

kis ehtiyāt se sapne sajāne paḌte haiñ

ye sañg-reze palak se uThāne paḌte haiñ

bahut se dard to ham baañT bhī nahīñ sakte

bahut se bojh akele uThāne paḌte haiñ

ye baat us se patā kar jo ishq jāntā ho

paloñ kī raah meñ kitne zamāne paḌte haiñ

har ek peḌ kā saayā nahīñ milā kartā

bilā ġharaz bhī to paude lagāne paḌte haiñ

kisī ko dil se bhulāne meñ der lagtī hai

ye kapḌe kamre ke andar sukhāne paḌte haiñ

kahāñ se lāoge tum is qadar jabīn-e-niyāz

qadam qadam pe yahāñ āstāne paḌte haiñ

Leave a Comment