kijiye na asiri men agar zabt nafas ko
de aag abhi shoala-e-avaz qafas ko
bah jaave lahu ho ke dil-e-qafila-salar
taalim de naala jo mira bang-e-jaras ko
pahunche hai nam-e-dagh-e-jigar ta sar-e-mizhgan
shadab main rakhta huun sada aag se khas ko
phirta hai udhar zulf men shana to idhar dil
ye duzd na laaya kabhu khatir men asas ko
ai ishq na farhad bacha tujh se na parvez
ba-khak barabar tu kiya na-kas-o-kas ko
le sakte nahin saans tiri ku ke muqayyad
ta khun-e-jigar biich na ghota den nafas ko
targhib na kar sair-e-chaman ki hamen ‘sauda’
har-chand hava khuub hai vaan lek havas ko
Leave a Reply