ahmad-faraz

Ishq Nashsha Hai Na Jadu Jo Utar Bhi Jae

ishq nashsha hai na jaadu jo utar bhi jaae

ye to ik sail-e-bala hai so guzar bhi jaae

talkhi-e-kam-o-dahan kab se azab-e-jan hai

ab to ye zahr rag o pai men utar bhi jaae

ab ke jis dasht-e-tamanna men qadam rakkha hai

dil to kya chiiz hai imkan hai ki sar bhi jaae

ham bagulon ki tarah khak-basar phirte hain

paanv shal hon to ye ashob-e-safar bhi jaae

lut chuke ishq men ik baar to phir ishq karo

kis ko malum ki taqdir sanvar bhi jaae

shahr-e-janan se pare bhi kai duniyaen hain

hai koi aisa musafir jo udhar bhi jaae

is qadar qurb ke baad aise juda ho jaana

koi kam-hausla insan ho to mar bhi jaae

ek muddat se muqaddar hai gharib-ul-vatani

koi pardes men na-khush ho to ghar bhi jaae

More Poems

Leave a Comment