kaun si vo sham.a thi jis ka main parvana hua
aur phir lau bhi lagi aisi ki divana hua
saqi-e-sar-mast se jab tak ki lene ko baḌhun
haath se girte hi chakna-chur paimana hua
dil harim-e-naz se le kar to ham nikle magar
ho gaya aalam kuchh aisa sab se begana hua
ḳhair thi ulfat men dil ne rang kuchh badla na tha
ab tamasha dekhiyega vo bhi divana hua
ham ne jaane kya kaha logon ne kya samjha use
sarguzisht-e-dard-e-dil thi jis ka afsana hua
faiz saaqi ne badal di surat-e-dil aur hi
pahle paimana tha paimana se mai-ḳhana hua
mere lab tak aate aate kyuun chhalak jaata hai ‘shauq’
jam-e-rangin saghar-e-mul ya ki paimana hua
Leave a Reply