rasta bhi tiri samt tha ghar teri taraf tha
ab ja ke khula mera safar teri taraf tha
angan tha mira aur na dar-o-bam the mere
main dhuup men tha saya-e-dar teri taraf tha
mahfil tujhe bas chhoḌ ke jaane ke liye thi
ik main hi faqat ḳhak-basar teri taraf tha
ujlat men na kar tark-e-ta.alluq ki shikayat
dil teri taraf yaad to kar teri taraf tha
a.ine men aur ab-e-ravan men tha tira aks
shayad ki mira dida-e-tar teri taraf tha
tu mausam-e-gul men bhi gurezan raha mujh se
main shaḳh-e-burida tha magar teri taraf tha
main tere havale se raha shahr men ma.atub
jo mera hunar tha vo hunar teri taraf tha
Leave a Reply