Jahanzeb Sahir
ḳhushi bhi kis ne kaha vaj.h-e-gham nahin hoti
bata vo shaam jo sham-e-alam nahin hoti
ham us jagah pe kira.e ke ghar men rahte hain
hamari raa.e kabhi mohtaram nahin hoti
tire ḳhayal ke aate hi lauTne se laga
har ek chiiz udasi men zam nahin hoti
jhuke hue hain ye sar to kisi musibat men
ye ik faqir ki gardan hai ḳham nahin hoti
jo tere saath mohabbat thi mar ga.i hai vo
magar jo tujh se aqidat hai kam nahin hoti
main apne dukh men barabar sharik huun lekin
bas ek mas.ala hai aankh nam nahin hoti
bata rahi hain parindon ki hijraten ‘sahir’
koi tabahi kabhi ek dam nahin hoti
Leave a Reply