khuun rulati hai tiri hasrat-e-didar mujhe
teri furqat ne kiya jaan se bezar mujhe
diin ke qabil na raha aur na raha duniya ka
tujh se khud kaam ne aisa kiya be-kar mujhe
ruuh kahti hai ki sau jaan se main sadqe huun
dil ke parde men nazar aaya hai jab yaar mujhe
jis ki chitvan ka tu ghayal hai main us ka zakhmi
dekhti kya hai tu ai nargis-e-bimar mujhe
umr akhir hui afsos badi ghaflat se
dam-e-murdan hi kiya maut ne hoshiyar mujhe
apne hathon se phansa huun main khud hi aafat men
hirs-e-duniya ne kiya banda-e-afkar mujhe
shaikh-ji jaiye masjid men nahin jaata main
but-e-kafir ne kiya sahib-e-zunnar mujhe
ik jhalak duur se dikhla ke ye chhina kaisa
samne aa ke dikha jalva-e-rukhsar mujhe
rakh ke tasvir-e-sanam dil men abas kahte ho
shaikh huun main but-e-kafir se sarokar mujhe
zabt-e-girya mujhe lazim hai ki aghyar men yaan
bazm men khaar na kar chashm-e-guhar-bar mujhe
baith kar kucha-e-shah men ye ‘jamila’ ne kaha
ghaus kaafi hai tira saya-e-divar mujhe