Tahir Adeem
husn-e-shi.ar men mujhe Dhalne nahin diya
us ne kisi bhi gaam sanbhalne nahin diya
haa.il rah-e-hayat men hassasiyat rahi
is dil ne do qadam mujhe chalne nahin diya
rakkha ba-sad ḳhulus rag-o-pai men mustaqil
lamha koi bhi dard ka Talne nahin diya
kuchh vo bhi chahta tha yahan mustaqil qayam
main ne bhi us ko dil se nikalne nahin diya
mahfil ko jo diya tire andaz-e-dad ne
aisa maza to meri ghazal ne nahin diya
ik baar e’tiraf-e-mohabbat pe umr bhar
ham ne use bayan badalne nahin diya
dariya hazar dil men bipharte rahe magar
ankhon men koi ashk machalne nahin diya
‘tahir-adim’ apna diya kya jala.ega
jis ne mira charagh bhi jalne nahin diya
Leave a Reply