ḳhumar-e-mausam-e-ḳhushbu had-e-chaman men khula
miri ghazal ka ḳhazana tire badan men khula
tum us ka husn kabhi us ki bazm men dekho
ki mahtab sada shab ke pairahan men khula
ajab nasha tha magar us ki baḳhshish-e-lab men
ki yuun to ham se bhi kya kya na vo suḳhan men khula
na puchh pahli mulaqat men mizaj us ka
vo rang rang men simTa kiran kiran men khula
badan ki chaap nigah ki zaban bhi hoti hai
ye bhed ham pe magar us ki anjuman men khula
ki jaise abr hava ki girah se khul jaa.e
safar ki shaam mira mehrban thakan men khula
kahun main kis se nishani thi kis masiha ki
vo ek zaḳhm ki ‘mohsin’ mire kafan men khula
Leave a Reply