Poet
ḳhulus-e-sajda har ik haal men muqaddam hai
vahin pe dil bhi jhuka de jahan jabin ḳham hai
hazar jalvon se pur-nur bazm-e-alam hai
magar charagh-e-mohabbat ki raushni kam hai
hamare hal-e-pareshan pe muskura dena
baḌa latif ye andaz-e-pursish-e-gham hai
hayat-e-ishq umidon pe kaTne vaalo
ḳhabar bhi hai ki umidon ki zindagi kam hai
qafas men the to chaman ke liye taḌapte the
chaman men aa.e to ahl-e-chaman ka matam hai
bashar ke dar pe jabin-e-bashar ka jhuk jaana
qasam ḳhuda ki ye tauhin-e-ibn-e-adam hai
vo dil chura ke nigahon se chhup ga.e ‘sharib’
nigah-o-dil se magar fasla bahut kam hai
Leave a Reply