Akram Naqqash
khuli aur band ankhon se use takta raha main bhi
tiri duniya ke pichhe bhagta phirta raha main bhi
miri avaz pichhli raat tujh tak kaise aa paati
kisi gahre kuen men raat bhar sota raha main bhi
ba-zahir dekhti ankhen ba-zahir jagti ruhen
ba-zahir in sabhon ke saath hi jiita raha main bhi
main huun is karsaz-e-be-kasan ki dastaras men yuun
vo jis sanche men bhi Dhala kiya Dhalta raha main bhi
badan malbus men sho.ala sa ik larzan qarin-e-jan
dil-e-ḳhashak bhi sho.ala hua jalta raha main bhi
hai jis rah-e-yaqin par gamzan pa-e-ḳhirad har-dam
usi rah-e-guman par muddaton chalta raha main bhi
Leave a Reply